Bayden Putinin atəşkəs təklifinə münasibət bildirib

ABŞ Prezidenti Co Bayden Rusiya tərəfindən Ukraynanın bütün təmas xətti boyunca atəşkəs elan edilməsinə münasibət bildirib.

Ağ Ev rəhbəri jurnalistlərə açıqlamasında Putinin bu qərarı verməsinə təəccüblənmədiyini deyib. “Yeni il ərəfəsində Putin xəstəxana, uşaq baxçaları və kilsələri bombalamağa hazır idi. Məncə, hazırda o, bir az nəfəs almağa çalışır”, - deyə Bayden bildirib.

Almaniyanın xarici işlər naziri Annalena Baerbok isə Putinin atəşkəs əmri ilə bağlı tviterdə yazıb. “Putin sülh istəsəydi, əsgərlərini vətənə gətirərdi və müharibə bitərdi. Amma deyəsən, qısa fasilədən sonra müharibəni davam etdirmək istəyir. Atəşkəs deyilən razılaşma Rusiya işğalı altında hər gün qorxu içində yaşayan insanlara nə azadlıq, nə də təhlükəsizlik gətirir. Ona görə də yenidən sülh içində və öz müqəddəratını təyin edərək yaşaya bilmələri üçün biz ukraynalıları dəstəkləməyə davam edəcəyik”, - deyə nazir yazıb.