Berlində Qarabağla bağlı təxribat

Martın 6-da Berlində “Arsaxın mədəni irsi” adlı qondarma tədbirin keçirilməsi nəzərdə tutulub. Özü də tədbiri Corc Sorosun Açıq Cəmiyyət İnstitutu maliyyələşdirir.

Təbii ki, fevralın 28-də Berlində Azərbaycan və Ermənistan xarici işlər nazirlərinin görüşündən sonra adından da göründüyü kimi, belə bir qondarma tədbirin təşkili sülh danışıqlarına zərbə vurmaqdan başqa bir şey deyil. Elə bu məqsədlə Azərbaycanın Qeyri-Hökumət Təşkilatları sözügedən “tamaşa”nın təşkilatçıları olan Almaniyanın Xarici Əlaqələr üzrə Alman Şurası və Konrad Adenauer Fondunun rəhbərlərinə açıq məktub ünvanlayaraq qərəzli və ermənipərəst tədbirin keçirilməsinə etiraz ediblər.

Məktubda 30 ilə yaxın müddətdə Azərbaycan torpaqlarının Ermənistan tərəfindən işğal altında saxlanılması, məscidlərimizin təhqir olunması faktları sadalanaraq sözügedən təşkilatların etnik təmizləmə və vandallıq hərəkətlərinə fəaliyyətsiz və səssiz qalmaları qınanılıb.

Mətndə o da qeyd olunub ki, işğal dövründə Qarabağda və Şərqi Zəngəzurda ermənilərin basdırdığı 1.5 milyondan çox mina və partlamamış hərbi sursatın təmizlənməsi prosesinə də qeyd edilən təşkilatlar etinasız yanaşıb.

“İnanmaq istəyirik ki, sizin müdaxilənizlə məsələ həllini tapacaq və rəhbərlik etdiyiniz qurumlar islamofob tədbiri ləğv edəcək”, – deyə məktubun sonunda qeyd edilib.