Bəşər Əsəd çıxılmaz vəziyyətdə | Suriyaya kim hakim olacaq? - HƏRBİ XRONİKA

"Hərbi xronika" rubrikasının yeni buraxılışı yayımlanıb.

Budəfəki buraxılışda hərbi jurnalist Fərdin İsazadə Suriyada baş verən son proseslərdən bəhs edib.

O, Suriyada son əməliyyatların 27 noyabr tarixində İdlib bölgəsindən başladığını xatırladaraq bildirib ki, “Heyət Təhrir əş-Şam” Hələb və Səraqib şəhərləri olmaqla iki istiqamətdə hücumları həyata keçirib:

“Onu da vurğulamaq lazımdır ki, bu əməliyyatlar ölkənin şimalında yerləşində Suriya Milli Ordusu ilə koordinasiyalı şəkildə həyata keçirilib. İlk olaraq əsas hücum istiqaməti kimi Hələb şəhəri seçildi. Qısa müddət ərzində “Heyət Təhrir əş-Şam”ın qüvvələri bilavasitə Hələbin kənar dairəvi yoluna gəlib yerləşdilər.

Sonrakı hadisələr onu göstərdi ki, həmin bu qüvvələr hökumət ilə başa-baş dirənmək niyyətində deyillərmiş. Onlar “Hilal” taktikasından istifadə etdilər. Hələbi şimaldan və cənubdan mühasirəyə alaraq hökumət qüvvələrinə cinahlardan zərbələr endirdilər. Nəticədə hökumət qüvvələri Hələb və ətraf yaşayış məntəqələrini tərk etmək məcburiyyətində qaldı. Onun əvəzinə həmin ərazilərdə bölgədə yerləşən YPG qüvvələri yerləşdi”.

Jurnalist qeyd edib ki, “Heyət Təhrir əş-Şam” geri çəkilməklə Həmada yenidən hökumət qüvvələrinin cəmlənməsi üçün şərait yaradıb, daha ağır zərbə endirmək niyyətində olub.

“Sonrakı günlərdə bu taktikanın baş tutduğunu gördük. Hələb ətrafında və ondan sonrakı böyük ərazilərdə “Heyət Təhrir əş-Şam” yaşayış məntəqələrini nəzarəti altına götürdü və oralarda yerləşdi. Eyni zamanda ölkənin şərq istiqamətində Hələbiyyə şəhərinin ətrafında yerləşdi və Həmaya hücumlarını gerçəkləşdirdi.

Burada da “Hilal” taktikasına əl ataraq hökumət qüvvələrinə cinahlardan zərbələr endirərək Həmanın məhəllələrini bir-birinin ardınca almağa davam etdilər. Paralel şəkildə Beyrazor-Həma yolunu nəzarət altına götürdülər”, – deyə jurnalist diqqətə çatdırıb.