Beynəlxalq Münasibətlərin Təhlili Mərkəzi məlumat yaydı

İkinci Qarabağ müharibəsində ermənilər arasında mülki əhalinin hərbçilərə münasibətdə ölüm faizi 2 faiz təşkil edir.

Bunu Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev deyib.

Bildirib ki, İkinci Qarabağ müharibəsində 50 mülki erməni həlak olub, bizdə isə 98 nəfər şəhid olub. Bu da Ermənistanın Gəncədə, Bərdədə mülki əhalini hədəf alması ilə bağlıdır.

Bundan başqa, sədr müharibədə həlak olan hərbçilərin statistikasını da açıqlayıb. Bildirib ki, Ermənistan tərəfində itkilər çox olsa da, Nikol Paşinyan hökuməti rəsmi olaraq 4000-ə yaxın hərbçinin həlak olduğunu bildirir.

Qarabağda olan mənzillərin və mədəni abidələrin qorunduğunu da deyən BMTM sədri həmçinin əlavə edib ki, bölgəyə qayıtmaq istəyən ermənilərə şərait yaradılacaq:

“Prinsipial olaraq biz buna razıyıq. Azərbaycanlıların da qayıtmaq hüququ var. Bu məsələni də biz beynəlxalq gündəmə gətiririk. Ermənilərin 10-a yaxın iddiası var. Əksər iddiası rədd olunub. Orada bir-iki iddia təmin olunub. Bununla bağlı Azərbaycan bəyan etmişdi ki, ermənilərin qayıtmasına, onların hüququnun müdafiəsinə hazırdır. Buna görə ermənilərin mədəniyyət abidələri Azərbaycan dövləti tərəfindən qorunur”.

Qarabağ banklarındakı əmanətlərin taleyi ilə bağlı məsələyə də aydınlıq gətirən Fərid Şəfiyev bildirib ki, ermənilər pulun, valyutanın hamısını özləri ilə aparıb.