Beynəlxalq Münasibətlərin Təhlili Mərkəzindən Luis Morenoya cavab

“Beynəlxalq Cinayət Məhkəməsinin keçmiş prokuroru Luis Moreno Okamponun Azərbaycan əleyhinə hazırladığı hesabat qərəzlidir və BMT Təhlükəsizlik Şurasının iclasından əvvəl bir sıra dövlətlərin dəstəyini cəlb etmək məqsədi daşıyır”.

Bu barədə Beynəlxalq Münasibətlərin Təhlili Mərkəzinin məqaləsində deyilir. Qeyd olunub ki, Okampo faktlara və qanuna “mətbəx təfəkkürü” ilə yanaşır.

O da bildirilib ki, Soyqırımı haqqında Konvensiyaya əsasən, Ermənistan Azərbaycana qarşı Beynəlxalq Ədalət Məhkəməsində iddia qaldıra bilər.

Mərkəzin analitikləri belə qənaətə gəliblər ki, Okamponun “şübhəli reputasiyası” və Azərbaycana qarşı qərəzli münasibəti ilə yanaşı, rəyin hüquqi və faktiki çatışmazlıqları onun beynəlxalq təşkilatlar, KİV və məhkəmə orqanları tərəfindən istifadəsi zamanı diqqətlə araşdırılmasını tələb edir.

Daha əvvəl beynəlxalq hüquq eksperti, “Temple Garden Chambers” hüquq firmasının müşaviri Rodni Dikson da Beynəlxalq Cinayət Məhkəməsinin sabiq prokuroru Okamponun avqustun 7-də ekspert rəyində irəli sürülən iddiaların əsassız və tamamilə etibarsız olduğu qənaətinə gəlib.