Bildiriş ABŞ tərəfindən göndərilib | XİN-dən USAİD-in işinin dayandırılması barədə  açıqlama

USAID-in ölkədə fəaliyyət göstərməsi üçün hüquqi əsas olmadığı və fəaliyyətini dayandırması barədə bildiriş ABŞ tərəfinə rəsmən göndərilib.

Bu barədə Xarici İşlər Nazirliyinin mətbuat katibi Ayxan Hacızadə bildirib.

Qeyd edək ki, xarici işlər naziri Ceyhun Bayramov Gürcüstanın xarici işlər naziri Maka Boçorişvili ilə birgə mətbuat konfransında demişdi ki, de-yure olaraq 1 iyun 2024-cü il tarixdən etibarən ABŞ-nin Beynəlxalq İnkişaf Agentliyinin Azərbaycanda fəaliyyət göstərməsinin hüquqi əsası yoxdur. Onların fəaliyyətinin tam olaraq dayandırılmasının vaxtı yetişib.

Onu da deyək ki, Donald Trampın ABŞ Prezidenti seçilməsindən sonra ABŞ Beynəlxalq İnkişaf Agentliyi adlı iri donor təşkilatının fəaliyyətini məhdudlaşdırmasına yönələn qərarlar qəbul edilib. Agentliyin veb-saytının artıq fəaliyyətini dayandırdığı, onun adının yazıldığı lövhələrin isə Vaşinqtonun mərkəzindəki baş qərargahın binasından yığışdırıldığı bildirilir. Agentliyin “X”dəki hesabı da ləğv olunub.