Bu fikirlər tamamilə qəbuledilməzdir | Ayxan Hacızadədən sərt açıqlama

Litvanın xarici işlər naziri Qabrielius Landsberqis Avropa Şurası Parlament Assambleyasında ölkəmiz əleyhinə fikirlər səsləndirib.

Azərbaycan Xarici İşlər Nazirliyinin mətbuat katibi Ayxan Hacızadə litvalı nazirin fikirlərinin tamamilə əsassız və qəbuledilməz olduğunu deyib:

“Azərbaycanla Avropa Şurası arasında əməkdaşlığın dalana dirəndiyini qeyd edən Avropa Şurası Parlament Assambleyası ilə dialoqa, açıq məsələləri həll etməyə çağıran Litva xarici işlər nazirinə xatırlatmaq istərdik ki, dialoqu dayandıran və bundan imtina edən Azərbaycan deyil, məhz AŞPA-da Azərbaycan nümayəndə heyətinin səlahiyyətlərinin dayandırılması barədə ədalətsiz və hüquqi cəhətdən suallar doğuran təşəbbüsü dəstəkləyən 76 nəfər parlament üzvləri olub”.

Xarici İşlər Nazirliyinin rəsmisi bildirib ki, Avropa Şurası Nizamnaməsinin pozulması ilə müşayiət olunan məlum addımdan sonra da Azərbaycan tərəfi müxtəlif kanallarla dialoqa açıqlığını, vəziyyətin həllində səmimi şəkildə maraqlı olduğunu nümayiş etdirib:

“Görünən odur ki, Avropa Şurası Nazirlər Komitəsində sədr olan Litva tərəfi Azərbaycanın AŞPA-da hüquqlarının əlindən alınmasından qətiyyən narahat deyil.

AŞPA daxilində Azərbaycana qarşı son illər, xüsusilə də Azərbaycan ərazilərinin Ermənistan işğalından azad edilməsindən sonra qərəzli yanaşmalar ölkəmizin beynəlxalq hüquqa və ədalətə söykənən mövqeyinə kölgə salmağa yönəlib. AŞPA-da təmsilçilik Azərbaycanın haqqıdır və bu haqqın qeyd-şərt olmadan təmin edilməsi zəruridir.

Azərbaycan nümayəndə heyətinin səlahiyyətləri barədə məsələyə səs verdiklərinə görə Avropa Şurası Parlament Assambleyası deputatlarının Azərbaycana girişinə qoyulan qadağa ilə bağlı fikirlərə gəldikdə qeyd edək ki, bu qərar Azərbaycan Respublikasının qanunvericiliyi əsasında suveren hüququmuz çərçivəsində atılıb və bu tədbir bir çox ölkələrin, o cümlədən Avropa Şurası üzv dövlətlərinin mövcud təcrübəsinə uyğundur. Azərbaycan nümayəndələrini AŞPA-da görmək istəməyən parlament üzvlərini ölkəmizdə görmək kimi bir niyyətimiz və öhdəliyimiz yoxdur”.