Ceyhun Bayramov Azərbaycanın bərpaolunan enerji layihələrindən danışıb - Baku TV

“İqlim dəyişikliyinin artan təsirləri milli iqtisadiyyatlar və dövlət maliyyəsi üzərində təzyiqi artırır”.

Bu sözləri xarici işlər naziri Ceyhun Bayramov BMT-nin İqlim Dəyişmələri üzrə Çərçivə Konvensiyasının Dördüncü İqlim Həftəsinin (CW4) rəsmi açılış mərasimində çıxışı zamanı deyib.

Nazir bildirib ki, qlobal qeyri-sabitlik, münaqişələr və bazarlardakı dəyişkənlik mövcud təzyiqləri daha da gücləndirir.

Onun sözlərinə görə, bu proseslər iqtisadiyyatın şaxələndirilməsini və enerji dayanıqlılığını milli təhlükəsizlik, iqtisadi sabitlik və uzunmüddətli dayanıqlılıq baxımından daha vacib edir:

“Biz irihəcmli Günəş və külək layihələrini istifadəyə verməklə, hidroenerji imkanlarını genişləndirməklə və beynəlxalq tərəfdaşlarla təmiz enerji layihələri həyata keçirməklə bərpa olunan enerji güclərimizi artırırıq. 2030-cu ilə qədər artıq imzalanmış sazişlər əlavə olaraq təxminən 6 GVt günəş və külək enerjisi gücünün yaradılmasını nəzərdə tutur”.

Ceyhun Bayramov qeyd edib ki, Azərbaycan bu planlarla 2030-cu ilə qədər qlobal bərpa olunan enerji gücünün üç dəfə artırılmasını nəzərdə tutan Birinci Qlobal Qiymətləndirmənin ambisiyasını aşmağa hazırdır.