Ceyhun Bayramov İran rəsmisi ilə görüşüb

Xarici işlər naziri Ceyhun Bayramovla İran xarici işlər nazirinin müavini Mehdi Səfəri Şərqi Zəngəzur iqtisadi rayonu ilə Azərbaycanın Naxçıvan Muxtar Respublikası arasında kommunikasiya bağlantılarının icrası istiqamətində həyata keçirilən tədbirlər barədə fikir mübadiləsi aparıblar.

Bu barədə Xarici İşlər Nazirliyindən məlumat verilib.

Görüşdə iqtisadi-ticarət əlaqələrinin dinamikasının artması məmnunluqla qeyd edilib və bu xüsusda iki ölkə arasında Hökumətlərarası Komissiyanın fəaliyyəti yüksək qiymətləndirilib.

Həmçinin regionda baş verən son proseslər ətrafında fikir mübadiləsi aparılıb.

Ceyhun Bayramov Ermənistanın siyasi və hərbi təxribatlarına son qoymaq və qanunsuz erməni silahlı birləşmələrinin Azərbaycan ərazisindən çıxarılmasını təmin etmək məqsədilə lokal xarakterli antiterror tədbirləri barədə ətraflı məlumat verib.