Ceyhun Bayramovdan iki dövlətin birgə təhsili ilə bağlı açıqlama

“Türkiyə-Azərbaycan Universitetinə tələbə qəbulu başa çatıb”.

Bu sözləri Azərbaycan Respublikasının xarici işlər naziri Ceyhun Bayramov türkiyəli həmkarı Hakan Fidanla birgə keçirdikləri mətbuat konfransında deyib.

O bildirib ki, ölkənin texniki sahədə ən bilikli, ən bacarıqlı namizədləri bu universitetə qəbul olmaq üçün müraciət edib və qəbul olunublar.

“Yeni tədris ilindən başlayaraq universitet ilk tələbələrinə qapılarını açacaq. Hesab edirik ki, vahid bir çətir altında Türkiyə və Azərbaycanın aparıcı universitetlərinin proqramlarını özündə birləşdirən bir universitetin yaradılması iki ölkənin bu sahədə əməkdaşlığının gücləndirilməsi, eyni zamanda həm Azərbaycanda, həm də daha geniş coğrafiyada əmək bazarına ən hazırlıqlı kadrların yetişdirilməsi üçün ciddi bir addımdır. Burada mən Türkiyə tərəfindən Orta Doğu, İstanbul Texniki və Hacettepe universitetlərini xüsusi olaraq qeyd etmək istərdim. Bu nüfuzlu universitetlər Azərbaycanda da tələbə hazırlığında ən fəal şəkildə iştirak edəcəklər”, – C.Bayramov əlavə edib.