COP29-da hansı sazişin maddəsi razılaşdırıldı? | Detallar açıqlandı

“Paris Sazişinin 6.8-ci maddəsi – iqlim dəyişikliyinin təsirlərinin azaldılması və iqtisadiyyatların müvafiq adaptasiyası üçün qeyri-bazar yanaşmaları razılaşdırılıb”.

Bunu ekologiya və təbii sərvətlər naziri, COP29-un prezidenti Muxtar Babayev COP29 çərçivəsində keçirilən mətbuat konfransında bildirib.

Onun sözlərinə görə, COP29-un ilk həftəsində irəliləyiş əldə edilib:

“Əvvəlcə 6.4-cü maddə üzrə, bu gün isə qeyri-bazar yanaşmaları ilə bağlı 6.8-ci maddə razılaşdırılıb. Bunlar 6-cı maddə üzrə danışıqların tamamlanması yolunda mühüm addımlardır”.

M.Babayev əldə edilmiş irəliləyişlərə baxmayaraq hesab edir ki, danışıqlar ləng gedir.

“Razılaşdırılmış həllə nail olmaq üçün tərəflər prosesi sürətləndirməlidir. Bu həftə danışıqlar yekun mərhələyə daxil olduğu üçün biz dünyanın hər yerindən nazirləri qəbul edirik. Siyasi liderlər ədalətli və iddialı bir razılaşmaya nail olmaq üçün bütün imkanlara malikdirlər. Onlar təkcə bu məsuliyyəti qəbul etmək deyil, həm də dərhal və konstruktiv işə başlamaq üçün məsuliyyət daşıyırlar”, – deyə o qeyd edib.