Daşkənddə keçiriləcək görüşlərin detalları məlum oldu - Baku TV

Prezident İlham Əliyevin Özbəkistana dövlət səfəri başlayır.

Səfər çərçivəsində Azərbaycan və Özbəkistan liderlərinin sədrliyi ilə Ali Dövlətlərarası Şuranın üçüncü iclasının keçirilməsi planlaşdırılır. Zirvə görüşünün gündəliyinə iki ölkə arasında strateji tərəfdaşlıq və müttəfiqlik münasibətlərinin daha da inkişaf etdirilməsi daxildir.

Danışıqların sonunda bir sıra mühüm sənədlərin imzalanması, həmçinin iqtisadi və humanitar layihələrə start verilməsi gözlənilir.

Azərbaycan–Özbəkistan münasibətləri son illərdə dostluq və qardaşlıq əlaqələrindən strateji tərəfdaşlıq və müttəfiqlik səviyyəsinə yüksəlib. Bu əlaqələrin təməlində ortaq tarix, dil, mədəniyyət və mənəvi dəyərlərlə yanaşı, iki ölkə liderləri arasında formalaşmış qarşılıqlı etimad və siyasi dialoq dayanır.

Son beş ildə dövlət başçıları səviyyəsində 15 qarşılıqlı səfərin həyata keçirilməsi münasibətlərin intensivliyini göstərir. 2024-cü ilin avqustunda Prezident İlham Əliyevin Özbəkistana, 2025-ci ilin iyulunda isə Özbəkistan Prezidentinin Azərbaycana dövlət səfərləri baş tutub. Bu səfərlər zamanı imzalanan “Strateji tərəfdaşlığın dərinləşdirilməsi haqqında Bəyannamə” və “Müttəfiqlik münasibətləri haqqında Müqavilə” ikitərəfli əlaqələrin hüquqi bazasını daha da möhkəmləndirib.

2023-cü ilin avqustunda yaradılan Ali Dövlətlərarası Şuranın artıq iki iclası keçirilib. Daşkənd və Bakıda keçirilən iclaslar uzunmüddətli əməkdaşlıq prioritetlərinin müəyyənləşdirilməsi və yeni təşəbbüslərin əlaqələndirilməsi baxımından mühüm platformaya çevrilib.

Hazırda Bakı ilə Daşkənd arasında münasibətlər yalnız ikitərəfli əməkdaşlıqla məhdudlaşmır. İki ölkə arasında həyata keçirilən ortaq layihələr və qarşılıqlı siyasi dəstək Türk dünyasında əməkdaşlığın gücləndirilməsinə də mühüm töhfə verir.