Dəniz mədənçiliyi ilə bağlı hansı problemlər var? | Ekoaktivist Bakıda çağırış etdi

BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində “FINS Initiative”in təşəbbüsü ilə dərin dəniz mədənçiliyi və balina ovuna qarşı etiraz aksiyası təşkil edilib.

Beynəlxalq təşkilatların dəstəyi, aktivistlər, fotoqraf və əcnəbi mütəxəssislərin dəstəyi ilə keçirilən aksiya COP29 məkanının Yaşıl Zonasında baş tutub. Aksiyada İsveçrə, Kanada və Böyük Britaniyadan nümayəndələr də iştirak ediblər.

Aksiya iştirakçıları Norveç hökumətinin dəniz ərazilərində yerli şirkətlərə dərin dəniz mədənçiliyi ilə məşğul olmaq üçün lisenziyalar verərək təbii resursların istismarına başlamaq planları ilə bağlı narahatlıqlarını ifadə ediblər.

Ekoaktivist Elisa Filips bildirib ki, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında aksiya keçirmək üçün yaradılan şəraitdən məmnundurlar:

“Biz Norveç hökumətini ölkəni əhatə edən dənizlərdə karbohidrogen hasilatının başlanmasına qarşı petisiyanı imzalayan 800-dən çox beynəlxalq alimi dinləməyə və planlarını yenidən nəzərdən keçirməyə çağırırıq. Həmçinin Norveçi qanundankənar balina ovunu dayandırmağa səsləyirik”.

Həmçinin onlar İslandiya, Yaponiya və Norveçdə ticarət məqsədli balina ovunu dayandırmaq üçün COP29-da qərar qəbul edilməsinə ehtiyac olduğunu bildiriblər.

Qeyd edək ki, COP29-un keçirildiyi Yaşıl Zonada “FINS Initiative”in təşəbbüsü ilə dərin dəniz mədənçiliyi və balina ovuna qarşı etirazla əlaqədar panel müzakirələr aparılıb.