Diplomatların Ağdam-Xankəndi yolu ilə tanışlığı

Azərbaycanda akkreditə olunmuş diplomatik korpus üzvləri və hərbi nümayəndələr Ağdama səfər ediblər.

Heyətin tərkibində 45 ölkə və 12 beynəlxalq təşkilatdan 100-ə yaxın diplomat və hərbi nümayəndələr olub.

Prezidentin köməkçisi Hikmət Hacıyev qonaqlara ermənilərin törətdiyi son təxribatlar barədə məlumat verib.

Diplomatik korpus üzvləri və hərbi nümayəndələr Ağdama səfər çərçivəsində Ağdam-Xankəndi yolunun üzərində inşa olunan Xaçın çayı körpüsündə olublar.

Onlar yolda aparılan tikinti işləri ilə tanış olublar. Burada qonaqlara avtomobil yolu, Xaçın çayı üzərində tikilən körpü haqqında və Ağdam-Bərdə dəmir yol xətti barədə məlumat verilib.

Diplomatlara Ağdam-Xankəndi yolunda Rusiya sülhməramlı kontingentinin yerləşdiyi ərazi göstərilib. Bildirilib ki, yollar humanitar məqsədlər üçün açıqdır. Bu yol Qarabağın dağlıq və aran hissəsini birləşdirən yoldur. Lakin təəssüflər olsun ki, ermənilər hələ də bu yolun açılmağına maneələr törədir.