Diqqət: Elmar Məmmədyarov Paşinyanın sərsəmliyini ifşa etdi

Oktyabrın 17-də Ermənistanın Baş naziri Nikol Paşinyan Avropa Parlamentinin sessiyasında çıxış edib.

O, çıxışı zamanı yenə də bir-birini təkzib edən fikirlər səsləndirib. Sülh sazişinin yaxın günlərdə imzalanacağına inandığını bildirən N.Paşinyan həm də Azərbaycana qarşı təcavüzkar ritorika və ittihamlarını davam etdirib.

N.Paşinyanın belə çıxış etməkdə məqsədi nədir?

Mövzu ilə bağlı fikirlərini yerli media ilə bölüşən sabiq xarici işlər naziri Elmar Məmmədyarov bildirib ki, N.Paşinyanın məlum çıxışında iki xətt aydın görünürdü:

“Bu xətlərdən biri daxili, digəri isə xarici auditoriya üçün nəzərdə tutulub. Xarici auditoriya üçün danışan erməni Baş nazir sülhə hazır olduqlarını və hətta yanvara qədər sülh sazişinin imzalanacağına inandığını deyir. Daxili auditoriya üçünsə daha çox Azərbaycan “vəhşiliyi”ndən danışır. Qarabağla bağlı sərsəm fikirlər səsləndirir”.

E.Məmmədyarov deyib ki, N.Paşinyanın fikirlərinin heç bir məntiqi əsası yoxdur: “Çünki Azərbaycanla Ermənistan arasında hazırda heç bir danışıq aparılmır. Proses tamamilə dayanıb. Danışıqlar intensiv şəkildə keçirilsəydi, masada sülh sazişinin hansısa layihəsi olsaydı, onda N.Paşinyanın konkret vaxt demək hüququ, bəlkə də, olardı. Amma ortada nə danışıqlar prosesi var, nə də ki hansısa sənədin layihəsi.

Baxmayaraq ki, cənab Prezident Gürcüstanda olarkən təklif etdi ki, Ermənistan birbaşa danışıqlar aparmaq istəyirsə, Azərbaycan buna hazırdır. Hətta Gürcüstanın vasitəçiliyi də gündəmə gəldi. Bu təklifdən xeyli vaxt keçib.

Amma Ermənistandan heç bir reaksiya görmədik. Əgər ermənilər, doğrudan da, sülh istəyirlərsə, onda bu təklifə cavab verməlidirlər.

Hələ ki, N.Paşinyan danışır, amma ortada bir proses görünmür. Xəbər var ki, bu ayın sonunda Brüsseldə yüksəksəviyyəli görüş keçiriləcək. Əgər bu informasiya öz təsdiqini tapsa və görüş keçirilsə, onda sülh sazişinin imzalanması ilə bağlı hansısa tarixi demək olar”.