Əli Əsədov və Aleksandr Turçin görüşdü | Nələr müzakirə edildi?

Mayın 5-də Baş nazir Əli Əsədov ölkəmizdə rəsmi səfərdə olan Belarus Respublikasının Baş naziri Aleksandr Turçin ilə görüşüb.

Hökumət başçıları təkbətək söhbət əsnasında Azərbaycan-Belarus iqtisadi-ticari əməkdaşlığının cari məsələlərini müzakirə ediblər. Baş nazirlər daha sonra iki ölkənin nümayəndə heyətlərinin iştirakı ilə geniş tərkibdə danışıqları davam etdiriblər.

2024-cü ilin yekunları üzrə qarşılıqlı ticarətin həcmində nəzərəçarpacaq artım müşahidə olunduğunu qeyd edən tərəflər əmtəə dövriyyəsinin artması tendensiyasının dəstəklənəcəyinə əminliklərini ifadə ediblər.

Qarşılıqlı ticarətin şaxələndirilməsi, investisiya əməkdaşlığının artırılması, kənd təsərrüfatı sahəsində əldə olunan müsbət dinamikaya xüsusi diqqət yetirilib.

Sənaye kooperasiyası sahəsində səmərəli əməkdaşlığı qeyd edən tərəflər “Gəncə Avtomobil Zavodu” İstehsalat Birliyi ilə Belarusun aparıcı maşınqayırma müəssisələri arasında həm kənd təsərrüfatı, həm də kommunal avadanlıqların yığılması üzrə işlərin davam etdirilməsi və genişləndirilməsi məqsədilə qarşılıqlı fəaliyyətə diqqət çəkiblər.

Tərəflər dərman və baytarlıq preparatlarının istehsalı sahəsində uğurlu qarşılıqlı fəaliyyəti alqışlayıblar. Danışıqların yekunlarına dair sosial müdafiə, baytarlıq və sənaye kooperasiyası sahələrində bir sıra sənədlər imzalanıb.