Əli Əsədov və Ceyhun Bayramov Rəisinin anım mərasimində

Mayın 22-də Baş nazir Əli Əsədovun rəhbərlik etdiyi nümayəndə heyəti İran Prezidenti Seyid İbrahim Rəisinin, xarici işlər naziri Hüseyn Əmir Abdullahiyanın və onları müşayiət edən digər şəxslərin helikopter qəzasında faciəvi surətdə həlak olmaları ilə əlaqədar Tehran şəhərində keçirilən rəsmi anım mərasimində iştirak edib.

Bu barədə Nazirlər Kabinetindən məlumat verilib.

Bildirilib ki, Baş nazir Əli Əsədov İranın Birinci vitse-prezidenti, Prezidentin vəzifəsini icra edən Məhəmməd Moxberlə görüşərək ona Azərbaycan Prezidenti, hökuməti və xalqı adından dərin hüznlə başsağlığı verib. Böyük dövlət xadimi, görkəmli siyasətçi Seyid İbrahim Rəisinin bütün həyatını ölkəsinə fədakarlıqla və sədaqətlə xidmətə həsr etdiyi vurğulanıb.

Qeyd edək ki, Azərbaycan nümayəndə heyətinə xarici işlər naziri Ceyhun Bayramov, həmçinin Milli Məclisin Azərbaycan-İran parlamentlərarası əlaqələr üzrə işçi qrupunun üzvləri Əziz Ələkbərov, Cavanşir Paşazadə, Cəbi Quliyev və digər rəsmi şəxslər daxildir.