Erməni spikerin qərəzli açıqlamalarına cavab

Ermənistan parlamentinin spikeri Alen Simonyan jurnalistlərə açıqlamasında növbəti dəfə regionda mövcud olan reallıqları təhrif edərək həqiqətdən uzaq fikirlər səsləndirib. Erməni spikerin bu müsahibəsi Ermənistan rəhbərliyinin xarici havadarların gözünə girmək uğrunda yarışdığına dəlalət edir.

Bu fikirlər Azərbaycan Milli Məclisinin Ermənistan parlamentinin spikeri Alen Simonyanın noyabrın 28-də verdiyi açıqlamaya münasibətində qeyd olunub.

Bildirilib ki, A.Simonyan Ermənistanın etnik təmizləmə siyasəti nəticəsində 1 milyondan artıq azərbaycanlının öz doğma torpaqlarından qaçqın və məcburi köçkün düşməsinə, Xocalı soyqırımının törədilməsinə, işğal dövründə 9 şəhər və yüzlərlə kəndin darmadağın edilməsinə görə üzr istəyərək, gələcək haqda danışmağa başlasa, daha yaxşı olardı.

A.Simonyanın Qazax rayonunun 7 kəndinin və Naxçıvanın Kərki kəndinin hələ də işğal altında qalmasına primitiv düşüncə tərzi ilə hüquqi don geyindirməyə çalışması, əksinə, Azərbaycanı işğalda ittiham etməsi isə xəstə təfəkkürün təzahüründən başqa bir şey deyil. 44 günlük Vətən müharibəsindən sonrakı 3 il ərzində Ermənistan öz siyasi və hərbi təxribatları ilə sülh prosesini əngəlləməyə çalışıb.

“Bir daha qeyd edirik ki, Azərbaycan regionda davamlı sülhün tərəfdarıdır və Ermənistanla münasibətlərin normallaşdırılmasını, sülh müqaviləsinin imzalanmasını dəstəkləyir. Biz inanırıq ki, sülh müqaviləsinin imzalanması üçün hazırda geniş imkanlar var.

Ona görə də Ermənistan tərəfini bu cür təxribatçı və həqiqətdən uzaq bəyanatlar səsləndirməkdən çəkinməyə və sülhə töhfə verməyə çağırırıq”, – deyə Milli Məclisin açıqlamasında qeyd edilib.