Ermənilər Qazaxın kəndlərini tərk edərkən evləri yandırırlar

Ermənistanın Tavuş vilayətinin Kirants kənd sakini sərhədlərin delimitasiyası prosesində həyətyanı sahəsinin Azərbaycanın ərazisinə düşəcək hissəsindəki tikiliyə od vurub.

Bu hadisəni əks etdirən kadrlar sosial şəbəkələrin Ermənistan seqmentində yayılıb.

Görüntülərdə polis əməkdaşları və qonşuların yanğını söndürməyə çalışdığı əks olunub.

Qeyd edək ki, 2020-ci ildə də ermənilər işğal etdikləri Ağdamı və Kəlbəcəri, 2022-ci ildə isə Laçını tərk edərkən evlərə, inzibati binalara, meşələrə od vurub, dükanları, elektrik yarımstansiyalarını söküb dağıdıblar.

Xatırladaq ki, 2024-cü il mayın 15-də Azərbaycan və Ermənistan arasında sərhəddə Azərbaycan Baş nazirinin müavini Şahin Mustafayev və Ermənistan Baş nazirinin müavini Mher Qriqoryanın sədrliyi ilə Azərbaycanla Ermənistan arasında dövlət sərhədinin delimitasiyası üzrə Dövlət Komissiyasının və Ermənistanla Azərbaycan arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın doqquzuncu görüşü keçirilib.

Görüşdə Azərbaycan-Ermənistan sərhədinin dörd hissəsində sərhədin müəyyənləşdirilməsinə dair protokol və Azərbaycana məxsus olan 4 kəndin geri qaytarılmasına dair razılaşma əldə olunub.