Ermənistan ABŞ silahlarını nə üçün Zəngəzur zonasında yerləşdirdi? | Mühüm açıqlama

Bir tərəfdən Bakı və İrəvanı sülhə çağıran Amerika Birləşmiş Ştatları digər tərəfdən Ermənistana hərbi və siyasi dəstək verməkdə davam edir. Bu günlərdə ABŞ Silahlı Qüvvələrinə məxsus 2 hərbi yük təyyarəsinin şəxsi heyətlə və hərbi yüklərlə birlikdə Ermənistanın Zvartnots Hava Limanına enməsi kimi əsaslı məlumatlar artıq Vaşinqtonun bəyanatlardan əməli fəaliyyətə keçdiyini göstərir.

Siyasi analitiklər bildirirlər ki, əgər Türkiyə faktoru olmasaydı, biz Ermənistana hərbi yüklərlə bərabər daha çox hərbi təyyarələrin eniş etməsinə şahid ola bilərdik.

Azərbaycan Ermənistanın sürətli şəkildə silahlanması və hərbi təlimlər keçirməsindən narahatlıq ifadə edəndə, Qərb dövlətləri “biz Ermənistanın müdafiə qabiliyyətini artırırıq və atılan addımlar Azərbaycana qarşı yönəlməyib” deyirdilər. Lakin prosesi diqqətlə incələdikdə, müşahidə edə bilərik ki, Ermənistana verilən silahlar müdafiə silahları deyil. 44 günlük Vətən müharibəsində Ermənistan ordusu Azərbaycan qarşısında hansı döyüş sahələrində uğursuz olubsa, İrəvan indi o sahələrdə güclənməyə çalışır.

Ekspertlər bildirirlər ki, bununla əslində bir neçə ölkəyə mesaj verilə bilər. Öncə Azərbaycana mesaj verilir ki, Zəngəzurla bağlı hər hansı ciddi hərbi planları olsa, bundan geri çəkilsin. Hərçənd ölkəmizin belə bir hərbi planının olmadığı hər kəsə məlumdur. Belə əsassız iddiaları Ermənistanın siyasi manipulyasiya vasitəsi kimi istifadə etməsi isə çoxuna agahdır.

Siyasi şərhçilər ikinci mesaj kimi bunun Rusiyaya yönəldiyini bildirirlər. Çünki Rusiya 10 noyabr sülh bəyanatının 9-cu bəndini əsas tutaraq Zəngəzur dəhlizinin açılmasını və koridorun Rusiya Federal Təhlükəsizlik Xidmətinin nəzarətində olmasını istəyir.

Burada həmçinin Zəngəzur yolunda müəyyən qədər marağı olan Türkiyəyə də mesaj verildiyi bildirilir. Eyni zamanda belə addımların Tehrana da xəbərdarlıq olduğunu nəzərdən qaçırmayan analitiklər İran-İsrail münasibətləri gərginləşərsə, bu vaxt ABŞ-nin İran sərhədlərinə də hər hansı müdaxilə ehtimalını artıra biləcəyini vurğulayırlar. Lakin belə manevrlərin İrandan daha çox Azərbaycan və Rusiyaya ötürülən siqnal olduğu xüsusi qeyd olunur.