Ermənistan növbəti müharibə hazırlığındadır | Hikmət Babaoğlu
“Şübhəsiz ki, müharibədən ötən 4 il müddətində sülh əldə olunmayıbsa, mütləq bunun bir səbəbi var. Bu da Ermənistanın müharibəni yenidən alovlandırmaq və öz lehinə təmin etmək cəhdləridir”.
Bu sözləri Hikmət Babaoğlu Baku TV-yə açıqlamasında deyib.
Bildirib ki, bu kontekstdə bəzi Avropa ölkələri, xüsusən Fransanın təşəbbüsü ilə Ermənistanı silahlandırmağa başlayıblar. Həmin ölkələrin içərisində son dövrlərdə almanların da adı çəkilir. Bu da Fransanın təşəbbüsü ilə həyata keçirilir. Çünki Fransa hesab edir ki, Avropa ölkələrini Azərbaycana qarşı kökləməklə ümumi Avropanın mövqeyini müəyyənləşdirərək, ölkəmizi beynəlxalq münasibətlər sistemində yalnızlaşdıra bilər.
“Ermənistanın aldığı silahlar hücum silahlarıdır və hara hücum edəcək bəllidir. O silahlar mütləq Azərbaycana tuşlanacaq, çünki 30 il torpaqlarımız ermənilər tərəfindən işğal altında saxlanılıb.
Biz bilirik ki, Ermənistanda revanşistlər, radikallar və müxtəlif imperializmin orada olan mərkəzləri növbəti müharibə hazırlığındadırlar. Azərbaycan buna nəzarət edir və onlar hesab etməsinlər ki, bizi hansısa formada aldada bilərlər. Çünki Azərbaycanın kosmosda peykləri var və peyk vasitəsilə Ermənistan Ordusunun dislokasiyası, yerdəyişməsi, hansı silahları əldə etməsi və nə vaxt, necə daşınmasına qədər Azərbaycanın xüsusi məlumatları var”, – deyə H.Babaoğlu əlavə edib.
![icon](/images/loading.png)