Ermənistan və Azərbaycan XİN razılığa gəldi | Paşinyandan sülhlə bağlı mühüm açıqlama

“Ermənistan bu ay Azərbaycanla sülh müqaviləsi imzalamağa hazırdır”.

Bunu Ermənistanın Baş naziri Nikol Paşinyan Moskvada MDB Dövlət Başçıları Şurasının məhdud tərkibdə keçirilən iclasında deyib. O bildirib ki, bu, Ermənistanın rəsmi mövqeyidir.

“İndiki mərhələdə biz ölkələrimiz arasında sülhün möhkəm təməlinə çevrilə biləcək bir sıra fundamental məsələlər üzrə qərar qəbul etməliyik.

Bu, bir-birimizin ərazi bütövlüyünün tanınması, bir-birinə qarşı ərazi iddiaları və gələcəkdə belə iddialarla çıxış etməmək öhdəliyi, güc tətbiq etməmək və bir-birinin daxili işlərinə qarışmamaq, diplomatik münasibətlər qurmaq və sülh müqaviləsi tərəflərinin üzərinə götürdükləri öhdəlikləri yerinə yetirmək üçün ikitərəfli mexanizmlərin yaradılması məsələsidir”, – deyə N.Paşinyan bildirib.

Baş nazir həmçinin qeyd edib ki, Ermənistan və Azərbaycanın xarici işlər nazirləri sülh müqaviləsi layihəsinin təsdiqini başa çatdırmaq üçün işi gücləndirmək barədə razılığa gəliblər.

N.Paşinyan əlavə edib ki, Ermənistan öz ərazisində bütün kommunikasiyaları açmağa, nəqliyyat keçidini və Naxçıvanla Azərbaycan arasında boru kəmərinin çəkilməsini təmin etməyə, qarşılıqlı suverenliyə hörmət etməklə sərhəd nəzarəti prosedurlarını sadələşdirməyə hazırdır.

Baş nazir qeyd edib ki, Ermənistan ərazisində təhlükəsiz tranzit bu ölkənin öhdəliyidir: “Biz bu təhlükəsizliyə zəmanət veririk”.