Ermənistanda bayraqları ucalan dövlətlər

Ermənistan son 3 il ərzində Azərbaycanla sərhədyanı ərazilərdə düz üç ölkənin – Rusiya, İran və ABŞ-nin bayraqlarını qaldırıb.

Daha dəqiq desək, bir-biri ilə düşmən münasibətdə olan ölkələrdən belə rəsmi Bakıya qarşı öz məkrli planları üçün istifadə edir, riyakar siyasət yürüdür. Üstəlik, həmin ölkələr də öz məqsədləri naminə Azərbayacana qarşı Ermənistanın yanında yer alaraq ikili siyasət həyata keçirirlər. Özünü müstəqil adlandıran dövlətin sərhədlərini başqa ölkələrin qoruması isə onun suverenliyini kölgə altına salır.

Hər zaman sülh və sabitliyin tərəfdarı olan Azərbaycan ərazi bütövlüyümüzə yaranan təhdidlər qarşısında ilk növbədə məsələni dinc yolla həll etməyə çalışıb. Lakin Ermənistan humanist mövqeyimizin əksi olaraq müxtəlif ölkələri prosesə cəlb edib, məsələni siyasiləşdirib və hərbi müstəviyə daşıyıb. Daha dəqiq desək, çirkin xislətindən doğan mənfur niyyətlərini hər fürsətdə nümayiş etdiriblər.

Təbii ki, rəsmi Bakının mövqeyi beynəlxalq hüquqa əsaslanır və sərhədlərinə, ərazi bütövlüyünə yaranan təhdid qarşısında etiraz etmək, müdafiə olunmaq hüququ var. Başqa ölkələrin, xüsusən də özünü demokratik dəyərlərin carçısı kimi göstərib, bunun əksini edən dövlətlərin yersiz müdaxiləsi qəbuledilməzdir. Heç bir qüvvə Azərbaycanı haqq yolundan döndərə bilməz.