Ermənistanın "Dördüncü respublika" planının arxasında nə dayanır? - Baku TV

Ermənistan hökuməti 2026–2031-ci illəri əhatə edən fəaliyyət proqramını təsdiqləyib.

Baş nazir Nikol Paşinyan bildirib ki, sənəd tam şəkildə “Real Ermənistan” ideologiyası və “Dördüncü Respublika” konsepsiyasına əsaslanır.

Mövzu ilə bağlı Baku TV-yə danışan Milli Məclisin deputatı Azər Badamov bildirib ki, bu konsepsiya Paşinyanın seçkiöncəsi irəli sürdüyü siyasi xəttin davamıdır.

Deputatın sözlərinə görə, proqramın əsas istiqamətlərindən biri Ermənistanın 27,9 min kvadratkilometrlik sərhədlər çərçivəsində “real dövlət” kimi qəbul edilməsidir:

“Paşinyan açıq şəkildə bəyan etdi ki, Kərki, Bərxudarlı və Yuxarı Əskipara Ermənistana aid deyil. Bu, Azərbaycanın yaratdığı sülh reallıqlarının Ermənistan tərəfindən qəbul olunduğunu göstərir”.

Azər Badamov qeyd edib ki, proqramda Azərbaycanla sülhün hüquqi və institusional sənədlərlə möhkəmləndirilməsi, sərhədlərin delimitasiya və demarkasiyasının davam etdirilməsi, həmçinin Türkiyə və Azərbaycanla münasibətlərin normallaşdırılması xüsusi yer tutur:

“Ermənistan artıq anlayır ki, regionda sülh və əməkdaşlıq olmadan gələcəyə baxmaq mümkün deyil”.

Deputatın fikrincə, proqramda regional kommunikasiyaların açılması, dəmir yolu xətlərinin və sərhəd-keçid məntəqələrinin bərpası da əsas hədəflər sırasındadır. O hesab edir ki, növbəti mərhələdə Ermənistan Konstitusiyasından Azərbaycana qarşı ərazi iddialarının çıxarılması istiqamətində də addımlar atıla bilər.

Paşinyanın Bağanis Ayrım, Kərki, Bərxudarlı və Yuxarı Əskiparanın Azərbaycan ərazisi olduğunu etiraf etməsinə münasibət bildirən Azər Badamov vurğulayıb ki, bu, mühüm siyasi bəyanatdır:

“Bu kəndlərin Azərbaycana məxsus olduğunu Ermənistanın Baş nazirinin etiraf etməsi artıq məsələnin həlli istiqamətində ciddi siyasi addımdır”.

Deputat əlavə edib ki, anklav kəndlərin qaytarılması delimitasiya və demarkasiya komissiyalarının apardığı danışıqlar çərçivəsində, qarşılıqlı razılaşma əsasında həll olunmalıdır:

“Delimitasiya və demarkasiya bir gündə başa çatan proses deyil. Əsas odur ki, tərəflər artıq bu məsələlərin danışıqlar yolu ilə həllini qəbul ediblər”.