Ermənistanın kapitulyasiya aktına imza atmasından 3 il ötür

Ermənistanın Azərbaycan Ordusunun qüdrəti qarşısında tab gətirməyib döyüş meydanında rüsvayçı məğlubiyyətə düçar olduqdan sonra kapitulyasiya aktına imza atmasından 3 il ötür.

10 noyabr tarixi Azərbaycan üçün böyük önəm daşıyır. Məhz bu gün Azərbaycan 44 gün ərzində davam edən Vətən savaşında qalib olmağın haqlı qürurunu yaşadı.

10 noyabr bəyanatı üçtərəfli olsa da, onu canlı yayımda Azərbaycan Prezidenti İlham Əliyev və rusiyalı həmkarı Vladimir Putin imzaladı. Ermənistan Baş nazirinin isə bəyanata imza atdığı məkan bu günə qədər bəlli deyil.

Kapitulyasiya aktının hansı şəraitdə imzalanmasından asılı olmayaraq, Ermənistan istənilən halda faktiki olaraq 10 noyabr axşamı rüsvayçı şəkildə məğlub olduğunu bəyan etdi. Həmin bəyanatda Azərbaycan bütün şərtlərini ermənilərə diqtə etməyə nail oldu. Ermənistan tərəfi Kəlbəcər, Laçın və Ağdam kimi strateji əhəmiyyətli rayonları bir güllə atmadan Azərbaycan Ordusuna təhvil verdi. 10 noyabr üzərindən illər keçsə də, Azərbaycanın şanlı tarixində mühüm mərhələ hesab olunacaq.

Bu tarix bizim haqq savaşımızın qalibiyyətlə başa çatdığı gün kimi yaddaşlarda həkk olunub. Azərbaycan 44 günlük müharibədən cəbhədə və siyasi arenada mütləq qalib kimi çıxdı.

2023-cü ilin sentyabr ayında Azərbaycan Silahlı Qüvvələri lokal antiterror tədbirləri həyata keçirdi. Bunun nəticəsində qondarma rejim ləğv edildi. Azərbaycan isə əbədi və əzəli torpaqları olan Xankəndi, Xocalı, Əsgəran, Xocavənd üzərində tam suveren hüququnu bərpa etdi.