Ermənistanın növbəti hiyləgərliyi | Nikolun budəfəki məqsədi nədir?

Martın 18-də Ermənistanın Baş naziri Nikol Paşinyanın Tavuş bölgəsində yerli sakinlərlə görüşdə rəsmi Bakının tələb etdiyi kəndlərin Azərbaycana məxsus olduğuna işarə etməsi orada yaşayan əhalinin narazılığına səbəb olub.

Hökumətlə yerli sakinlər arasında yaranan anlaşılmazlıq həm də yeni xaosun anonsu kimi qiymətləndirilib və martın 24-də bu ehtimallar özünü doğruldub.

“Döyüş qardaşlığı” adlanan silahlı qruplaşmanın üzvləri Qazaxın Ermənistanın işğalı altında olan Yuxarı Əskipara kəndinə daxil olmaq istəyərkən saxlanılıb. Düzdür, silahlılar tezliklə azad edilsə də, hadisənin təfərrüatı da çox keçmədən üzə çıxıb.

Belə ki, 2023-cü ildə həmin qruplaşma ilə ermənilərin Noyemberyan adlandırdığı İncəsu rayon bələdiyyəsi arasında əməkdaşlıq memorandumu imzalanıb. Razılaşmaya əsasən, icmanın üzvləri sakinlər üçün təlimlər keçərək onların döyüş hazırlığını artıracaq. Yəni icmanın bu addımı dövlət qurumu ilə razlaşdırılıb, özbaşına deyil.

Sadəcə xəbərin Azərbaycan ictimaiyyətində yayılmasından sonra icmanın fəaliyyətinə maneələr yaradılıb və bununla hadisənin əsl mahiyyətindən yayınmağa cəhd edilib.

Təbii ki, nə qədər gec deyil, Ermənistan süni əngəllərlə vaxt uzatmaq əvəzinə işğal altında saxladığı Azərbaycan ərazilərini geri verməlidir. Çünki kəndlərin qaytarılmaması müharibə üçün səbəb sayıla bilər. Belə olan halda isə Azərbaycanın cavabı sərt olacaq.

Ermənistan hökumətinin, şəxsən Baş nazir N.Paşinyanın bu günə qədər bir-birinə zidd addımlar atdığını nəzərə alsaq, bu hadisənin də mərkəzində hiyləgərliyin və təxribatın olduğu təəccüb doğurmur. Lakin istər Ermənistanın hakimiyyəti, istərsə də vətəndaşları bu gedişatın onlar üçün heç bir fayda verməyəcəyini anlamalı və tarixdən dərs çıxarmalıdırlar.