Ermənistanın törətdiyi cinayətlər sənədləşdirilir | Əziz Ələkbərlidən mühüm açıqlama

“Ermənistanın törətdiyi cinayətlərin hər biri haqqında bizdə sənədlər hazırlanır, fəaliyyətimizin ilk mərhələsində bununla bağlı Baş Prokurorluğa müraciət etdik”.

Bunu Qərbi Azərbaycan İcmasının sədri Əziz Ələkbərli deyib.

O bildirib ki, İcma ilə birlikdə çoxsaylı cinayət işləri araşdırılıb, eyni zamanda Baş Prokurorluq tərəfindən rayon prokurorluqlarına da tapşırıqlar verilib:

“Həmin insanların hər biri ilə əlaqə saxlanılır, faktlar, sənədlər toplanılır, şahidlər dindirilir. Qərbi Azərbaycan İcması bu işi başa çatdıracaq”.

Ermənistanın xarici işlər naziri Ararat Mirzoyanın Qərbi azərbaycanlılara təzminat ödənildiyi ilə bağlı iddialarına münasibət bildirən Ə.Ələkbərli qeyd edib ki, onun çıxışının heç bir hüquqi əsası yoxdur:

“Həmin kompensasiya zərərçəkən ermənilərə ödənilib. A.Mirzoyan bu fikri səsləndirməklə Azərbaycana qarşı növbəti iftirasını atır. Ermənistan ciddi addımlar atacaqsa, onlara qarşı ciddi hüquqi geri dönüşlər olacaq”.