Ermənistanla sərhədlər açılacaq? - Paşinyan məqsədləri açıqladı
“Bizim iki qonşumuzla yollarımız bağlıdır. Yollar olmadan sülhə nail olmaq çətindir”.
Bunu Ermənistanın Baş naziri Nikol Paşinyan oktyabrın 26-da Tbilisi Beynəlxalq İpək Yolu Forumunun açılış mərasimində deyib.
N.Paşinyan bildirib ki, Cənubi Qafqazda sülhə ehtiyac var:
“Bizim hökumətimiz sülh gündəliyinin vacib hissəsi olaraq “Sülh Kəsişmələri” layihəsini təqdim edir. Bu layihənin mahiyyəti avtomobil yollarının, dəmir yollarının, kəmərlərin, telekommunikasiyaların, eləcə də elektrik xətlərinin yenidən qurulması və tikilməsi yolu ilə Ermənistan Türkiyə, Azərbaycan və İran arasındakı əlaqəni inkişaf etdirməkdir.
İrəvan və Bakı Ermənistanın 29 800 kvadratkilometr olmaqla, Azərbaycanın isə 86 600 kvadratkilometr olmaqla ərazi bütövlüyünü qarşılıqlı şəkildə tanıyıb.
Azərbaycan və Ermənistan Alma-Ata Bəyannaməsini imzalayan 12 ölkə arasında olub və bu bəyanatı imzalayan tərəflər kimi Azərbaycan və Ermənistan da bir-birinin ərazi bütövlüyünü, suverenliyini, inzibati sərhədlərinin toxunulmazlığını qəbul edib. Ümid edirik ki, bu prinsiplər əsasında qarşıdakı aylarda biz Azərbaycanla sülh və əlaqələrin bərpası üzrə razılaşmaları imzalayacağıq”.
Nikol Paşinyan onu əlavə edib ki, bəyanatın imzalanmasından sonra Sovet İttifaqı respublikaları arasındakı inzibati sərhədlər dövlət sərhədlərinə çevrilib.
![icon](/images/loading.png)