Fariz İsmayılzadə Böyük Britaniyada mühüm görüşlər və tədbirlərdə iştirak etdi

Milli Məclisin deputatı, Azərbaycan-Böyük Britaniya parlamentlərarası əlaqələr üzrə İşçi Qrupunun rəhbəri Fariz İsmayılzadə yanvarın 17-dən 21-dək Londonda işgüzar səfərdə olub.

Səfər çərçivəsində o, ikitərəfli əlaqələrin və Azərbaycan ilə Böyük Britaniya arasında əməkdaşlığın genişləndirilməsi məqsədilə bir sıra mühüm görüş və tədbirlərdə iştirak edib.

Görüşlərdə parlamentlərarası əlaqələrin inkişafı, iqtisadi əməkdaşlığın gücləndirilməsi və müxtəlif sahələrdə əməkdaşlıq imkanları müzakirə olunub.

Fariz İsmayılzadə Böyük Britaniya parlamentində keçirilən "COP29 və iqlim dəyişikliklərinə dair təşəbbüslər: Qeyri-müəyyənlik ilində düşüncələr" mövzusunda panel müzakirəsində iştirak edib.

Millət vəkili COP29 zamanı Azərbaycanın əldə etdiyi nailiyyətlərdən danışaraq ölkəmizin qlobal iqlim təşəbbüslərinə sadiqliyini vurğulayıb.

Fariz İsmayılzadə Böyük Britaniyanın nüfuzlu beyin mərkəzlərinin nümayəndələri ilə də görüşüb. Görüşlərdə qlobal təhlükəsizlik, regional inkişaf və Azərbaycanın beynəlxalq çağırışların həllindəki rolu müzakirə olunub.

Millət vəkili ölkəmizin Böyük Britaniyadakı səfirliyində 20 Yanvar faciəsinin 35-ci ildönümünə həsr olunan tədbirdə iştirak edərək Qanlı Yanvar hadisələri haqqında ətraflı məlumat verib.

Həmçinin Fariz İsmayılzadə Varvik Universitetinin nümayəndələri ilə görüşərək Azərbaycan universitetləri ilə akademik və elmi tədqiqat sahəsində əməkdaşlığın inkişaf imkanlarını müzakirə edib.