Fransada yaralanan jurnalistlərə Ankaradan dəstək

Türkiyə Prezident Administrasiyası azərbaycanlı jurnalistlərin Fransada hücuma məruz qalmasına münasibət bildirib.

Bu barədə Administrasiyanın Kommunikasiya İdarəsinin rəisi Fəxrəddin Altun “Twitter” hesabında yazıb.

O qeyd edib ki, Fransada Azərbaycanın rəsmi dövlət televiziyası olan “AzTV”nin əməkdaşlarının xidməti vəzifələrini yerinə yetirərkən hücuma məruz qalmaları Türkiyədə üzüntü ilə qarşılanıb.

“Avropanın insan hüquq və azadlıqlarının müdafiəsi kontekstində günü-gündən nüfuzunu itirdiyini ortaya qoyan mətbuat və məlumat azadlığına edilən bu mənfur hücumu qətiyyətlə pisləyirik. Biz gözləyirik ki, Fransa rəsmiləri və hüquq-mühafizə orqanları hücumun səbəbkarlarını dərhal müəyyənləşdirib məsuliyyətə cəlb edəcəklər. Mən də Azərbaycan Prezidentinin köməkçisi, hörmətli qardaşım Hikmət Hacıyevə telefonla zəng vurub dedim ki, Türkiyə olaraq bu mənfur hücuma işıq salmaq üçün bütün imkanlarımızdan istifadə edəcəyik. Hücum nəticəsində yaralanan azərbaycanlı jurnalist qardaşımıza tezliklə şəfa diləyir, bütün qardaş Azərbaycan xalqına onların adından ən xoş arzularımı çatdırıram”, – deyə paylaşımda bildirilib.