Gələn il dünyada keçiriləcək seçkilərin mümkün nəticələri

“2024-cü ildə bir çox ölkələrdə keçiriləcək seçkilər dünyanın artıq vərdiş etdiyimiz simasını dəyişə bilər. Gələn il dünya əhalisinin yarıdan çoxunun yaşadığı ölkələrdə seçkilər baş tutacaq. Həmin ölkələrdə 4 milyarddan çox əhalinin yaşadığını nəzərə alsaq, sözügedən seçkilər dünyada bir sıra yeniliklərə yol aça bilər”.

Bu barədə “CNN”in analitiki Devid Andelman yazıb. Onun məqaləsi bir çox aparıcı media orqanlarının, eyni zamanda televiziya kanalının əsas mövzusuna çevrilib.

Seçkilərin keçiriləcəyi ölkələr sırasında Banqladeş, Hindistan, Rusiya, Avropa İttifaqı, ABŞ, CAR, İndoneziya, Pakistan, Meksika, Tayvan və digərləri qeyd edilib. Bu ölkələrdəki seçkilərin dünyanın simasını dəyişə biləcəyi ehtimalının olduğu vurğulanıb.

Rusiyaya gəldikdə isə Vladimir Putinin gələn ilin martında keçiriləcək seçkilərdə əsas favorit olduğu qeyd edilib. Onun mümkün rəqibinin Aleksey Neçayev ola biləcəyi bildirilib. V.Putinin yenidən prezident seçilməsinin isə növbəti illərdə dünyada qüvvələr balansına əhəmiyyətli dərəcədə təsir edə biləcəyi vurğulanıb.

ABŞ-də keçiriləcək seçkilərdə Donald Trampın qələbə qazanması ABŞ-də və bütün dünyada demokratiyanın əsaslarına zərbə endirə bilər. D.Trampın qələbəsi NATO və ABŞ-nin ümumi ritorikasına güclü təsir edəcək.

Bir sözlə, 2024-cü ildə baş tutacaq seçkilərin dünyada bir sıra dəyişikliklərə yol aça biləcəyi vurğulanıb.

Xatırladaq ki, gələn il fevralın 7-si Azərbaycanda da növbədənkənar prezident seçkiləri keçiriləcək.