Gənclərimiz o qədər vətənpərvərdir ki... | Ordumuzun dünyada bənzəri olmayan əməliyyatı

“44 gün ərzində şanlı Ordumuz hər gün irəli gedirdi, yaşayış məntəqələri işğalçılardan azad edilirdi. Dünya hərb tarixində buna oxşar hərbi əməliyyatlar olmayıb”.

Bu sözləri Prezident İlham Əliyev Qarabağ Universitetinin müəllim və tələbə heyəti ilə görüşündə söyləyib.

“Bir gün belə geriyə addım atmamışıq. Hər gün bir neçə kənd, qəsəbə, şəhər azad edilirdi. Bir nəfər belə döyüş meydanını tərk etmədi. Amma Ermənistanın rəsmi nümayəndələrinin etirafına görə, Ermənistan Ordusunda 12 mindən çox fərari olub. Bu, xalqımızın yüksək mənəvi keyfiyyətlərini göstərir”, – o bildirib.

Dövlət başçısının sözlərinə görə, mənəvi üstünlük, milli düşüncə olmasa, ordu qələbə qazana bilməz:

“Sinəsini qabağa verən gənclər o qədər vətənpərvərlik ruhunda tərbiyə olunublar ki, onlar üçün Vətən torpaqlarını azad etmək ən şərəfli missiya olub. Həmin gənclər bir amalla yaşayırdılar – milli ləyaqətimizi bərpa edək və bunu etdik. Müharibədən keçmiş ölkə kimi və Ali Baş Komandan kimi müharibənin nəticələrini şərtləndirən amillərə nəzər salaraq, tam əminliklə deyə bilərəm ki, birinci növbədə milli ruh məsələləri və mənəvi hazırlıqdır”.