Gərginlikdən istifadə edən qərb: Ermənistana görə Azərbaycana qarşı bəyanatlar verildi

Azərbaycanın Qarabağda keçirdiyi antiterror tədbirlərindən sonra Rusiya ilə Ermənistan arasında gərginlik yaranıb.

ABŞ və Fransa kimi ölkələr iki müttəfiq arasındakı gərginlikdən istifadə edərək bölgədəki təsirlərini artırmaq istəyirlər. Vaşinqton və Parisin siyasi xadimləri İrəvanı silahlandırmağa çağırıblar.

Bu barədə “Türkiye” qəzeti yazır. Nəşrin yazdığına görə, ABŞ başda olmaqla bir çox Qərb dövlətləri Rusiyanın təsirinin azaldığı bölgədə güclərini möhkəmləndirməyə çalışaraq, iki ölkə arasındakı gərginliyi bir fürsət olaraq görürlər.

Azərbaycanın Qarabağda 30 illik işğala son qoyan antiterror tədbirlərinə dünyadan reaksiyalar gəlməkdə davam edir. Beynəlxalq hüququn Azərbaycan ərazisi kimi tanıdığı Qarabağdakı əməliyyata reaksiya verən ABŞ və Fransadan bəzi şəxslər Ermənistanın silahlanmasının vacibliyi ilə bağlı bəyanatlar verməkdədirlər.

ABŞ Konqresində Ermənistanla dostluq qrupunda olan Arizona Nümayəndələr Palatasının üzvü Bred Şerman işğalın qarşısını almaq üçün ABŞ-nin Ermənistana müvafiq müdafiə silahları verməsini təklif edib. ABŞ senatında Şermanın bəyanatlarını dəstəkləyən bəyanatlar səsləndirən Miçiqan senatoru Qari Piters Azərbaycana təhlükəsizlik yardımını qadağan edən qanun layihəsini təqdim edib.

Digər tərəfdən, Fransanın müdafiə naziri Sebastien Lekornu Ermənistanın müdafiə ehtiyaclarını araşdırdıqlarını bildirib. Lekornu “Franceinfo”ya müsahibəsində bildirib ki, Fransa Prezidenti Emmanuel Makron Ermənistanla bağlı vəziyyəti şəxsən izləyir.

Moskvanın İrəvana təzyiqlərinə baxmayaraq Ermənistan ABŞ ilə birgə hərbi təlimlər keçib. Bu yolla Qərb Ermənistan vasitəsilə Rusiyanın həm bölgədən sıxışdırılıb çıxarılmasına, həm də bölgədə mövqelərinin möhkəmlənməsinə çalışır.