Gürcüstan mətbuatı İlham Əliyevin səfərini geniş işıqlandırıb - Baku TV

Gürcüstanın aparıcı televiziyaları və informasiya portalları Prezident İlham Əliyevin bu ölkəyə dövlət səfərini geniş işıqlandırıb.

Dərc olunan məqalə və yayımlanan sujetlərdə qeyd olunub ki, Azərbaycan Prezidenti İlham Əliyevin bu səfəri iki qardaş ölkə arasındakı əlaqələrə yeni təkan verəcək.

Dövlət başçısının mətbuata bəyanatında yer alan fikirlərinə diqqət çəkilərək bildirilib ki, ilin sonunadək iki ölkə arasında ticarət dövriyyəsinin həcmi bir milyardı ötə bilər.

Bu günə qədər Azərbaycan tərəfindən Gürcüstan iqtisadiyyatına 3,7 milyard dollar sərmayə qoyulduğu, ikitərəfli münasibətlərin qarşılıqlı hörmət və etimada əsaslandığı və bunun bütün qonşu dövlətlər üçün nümunə olduğu vurğulanıb.

Yerli mətbuatın yazdığına görə, Azərbaycan enerji təhlükəsizliyi baxımından Gürcüstan üçün etibarlı tərəfdaşdır. Qeyd olunub ki, Azərbaycan və Gürcüstan bütün beynəlxalq təşkilatlarda bir-birinin ərazi bütövlüyünü, suverenliyini və sərhədlərin toxunulmazlığını dəstəkləyir. Bu, hər zaman belə olub və gələcəkdə də belə olacaq.

Materiallarda Prezident İlham Əliyevin və birinci xanım Mehriban Əliyevanın hava limanında qarşılanma mərasimi, eləcə də dövlət başçısının gürcüstanlı həmkarı ilə görüşü, həmçinin Gürcüstanın Baş naziri İrakli Kobaxidze arasında görüşdən sonra mətbuata bəyanatında səsləndirdiyi fikirlər əksini tapıb.

Qeyd edək ki, ümumilikdə qonşu ölkənin 50-dən çox portal və televiziyasında 90-a yaxın material yayımlanıb.