Gürcüstan səfirinə Ukraynanı tərk etmək üçün 48 saat vaxt verildi

Gürcüstan səfiri Ukrayna Xarici İşlər Nazirliyinə çağırılıb. Bu barədə Ukrayna XİN-in mətbuat xidməti məlumat yayıb.

Bildirilib ki, iyulun 4-də səfir Georgi Zakaraşvili Gürcüstanın sabiq Prezidenti Mixeil Saakaşvilinin vəziyyətinin xeyli pisləşməsi ilə bağlı Ukrayna Prezidentinin etirazının çatdırılması üçün Nazirliyə dəvət olunub.

Gürcü diplomatın diqqətinə çatdırılıb ki, Ukrayna vətəndaşı olan Mixeil Saakaşviliyə qarşı bu münasibət qətiyyən yolverilməzdir, Gürcüstan hakimiyyəti Ukrayna vətəndaşına qarşı bu hərəkəti dayandırmalıdır. Bununla əlaqədar səfir G.Zakaraşvilinin mövcud vəziyyətin həlli yollarının tapılması istiqamətində məsləhətləşmələr aparmaq üçün Tbilisiyə getməsi tövsiyə olunub.

Volodimir Zelenski səfirə ölkəni tərk etməsi üçün 48 saat vaxt verib. Rəsmi Tbilisi isə səfirin Kiyevdən qovulması qərarının Gürcüstan hakimiyyətinə qarşı təhqir olduğunu açıqlayıb.

“Şərh vermək istəmirəm, amma ümumilikdə Ukrayna hakimiyyətinin bu mövqeyi bizim üçün təhqiramizdir”, – hakim “Gürcü Arzusu – Demokratik Gürcüstan” partiyasının sədri İrakli Kobaxidze belə deyib.