Ukrayna və İran XİN başçıları regional təhlükəsizlik barədə fikir mübadiləsi aparıblar

Ukraynanın xarici işlər naziri Andriy Sibiqa iranlı həmkarı Seyid Abbas Əraqçiyə zəng edib.

Bu barədə o, "X" hesabında paylaşım edib.

Sibiqa bildirib ki, iranlı həmkarı ilə söhbətində diplomatiyanın ən çətin şəraitdə belə birbaşa dialoqdan başladığını vurğulayıb.

O, əsas məqsədin gərginliyin daha da artmasının qarşısını almaq olduğunu qeyd edib.

Nazirin sözlərinə görə, Ukraynanın bütün addımları yalnız ölkəsini Rusiyanın təcavüzündən müdafiə etməyə yönəlib və heç vaxt mülki gəmiləri və ya dinc insanları hədəf almaq məqsədi daşımayıb.

Sibiqa İranı vəziyyəti daha da gərginləşdirə biləcək addımlardan çəkinməyə, həmçinin Rusiyanın Ukraynaya qarşı apardığı müharibəyə dəstəyini dayandırmağa çağırıb.

O əlavə edib ki, Ukraynanın mövqeyi dəyişməz olaraq qalır: Avropa və Yaxın Şərq sabitlik, təhlükəsizlik və sülhə layiqdir.