Heydər Əliyev Fondu və ICESCO arasında mühüm əməkdaşlıq sazişi imzalandı

Heydər Əliyev Fondunun vitse-prezidenti Leyla Əliyeva İslam dünyası Təhsil, Elm və Mədəniyyət Təşkilatının Mərakeşin Rabat şəhərində yerləşən qərargahında olub.

Oktyabrın 14-də ICESCO-nun baş direktoru Salim bin Məhəmməd əl-Maliklə görüşdə Fondun fəaliyyəti, Azərbaycan-ICESCO əməkdaşlığı, o cümlədən birgə layihələr müzakirə edilib.

Daha sonra Heydər Əliyev Fondu ilə ICESCO arasında Burkina-Fasoda məcburi köçkün qızlar və internat evləri üçün təhsil və sosial dəstək layihəsi üzrə əməkdaşlıq sazişi imzalanıb.

Sənədi Fondun icraçı direktoru Anar Ələkbərov və təşkilatın baş direktoru Salim bin Məhəmməd əl-Malik imzalayıblar.

Nümayəndə heyəti daha sonra ICESCO-nun Rabatdakı qərargahında yaradılan Peyğəmbər və İslam Sivilizasiyası Muzeyini ziyarət edib. Heydər Əliyev Fondunun vitse-prezidenti Leyla Əliyeva Muzeyin xatirə kitabına ürək sözlərini yazıb.