Horovlu sakinlərinə mənzillərinin açarları təqdim edildi

Prezident İlham Əliyev oktyabrın 28-də Cəbrayıl rayonuna səfər edib.

Dövlət başçısı rayonun Horovlu kəndinin birinci mərhələsinin açılışında iştirak edib.

Ümumi sahəsi 248 hektar olan kəndin ilk mərhələsində 94 hektarlıq ərazidə 334 fərdi ev, 624 şagird yerlik məktəb, 220 yerlik körpələr evi-uşaq bağçası, inzibati bina, bazar kompleksi, tibb məntəqəsi və idman-sağlamlıq mərkəzi tikilib.

Horovluda bərpa olunan “Əsgər”, “Şığı”, “Orta”, “Gülqasım” və “Xəlifə” kəhrizləri kəndin su təminatında mühüm rol oynayacaq. 4,4 hektar park kompleksi, oyun və idman meydançaları, yaşıllıq zolaqları və gəzinti yolları salınıb.

Prezident İlham Əliyev kənd sakinləri ilə görüşüb və onlara mənzillərin açarlarını təqdim edib.

Daha sonra dövlət başçısı Cəbrayıl şəhər məscidinin təməlini qoyub. Ümumi sahəsi 1530 kvadratmetrdən çox olan ikimərtəbəli məsciddə eyni vaxtda 615 nəfərin ibadəti üçün şərait yaradılacaq. Məsciddə icma zalı, söhbətgah, avtomobil dayanacağı, 34,2 metr hündürlüyündə iki minarə və 22,6 metr hündürlüyündə günbəz olacaq.

Prezident İlham Əliyev Cəbrayıl şəhərində ikinci və üçüncü yaşayış komplekslərinin də təməlini qoyub. İkinci yaşayış kompleksi 5,28 hektar ərazidə 23 binadan ibarət olacaq və 615 mənzili əhatə edəcək. Üçüncü yaşayış kompleksi isə 5 hektardan çox ərazidə salınacaq, burada 25 binada ümumilikdə 746 mənzil inşa ediləcək.

Dövlət başçısı həmçinin Hacıqabul-Bəhrəmtəpə-Ermənistan sərhədi avtomobil yolunun 197-ci kilometrindən “Şəfəq” Günəş Elektrik Stansiyasına gedən 11,5 kilometrlik avtomobil yolunun açılışında iştirak edib. Yol IV texniki dərəcəyə uyğun iki hərəkət zolağı ilə inşa olunub.

Prezident İlham Əliyev Şahvəlli kəndində hər biri 50 meqavat gücə malik “Şəms” və “Üfüq” Günəş Elektrik Stansiyalarının da təməlini qoyub. Hər iki stansiyada ildə 206 milyon kilovat-saat elektrik enerjisi istehsal ediləcək. Bu, hər il 44 milyon kubmetr təbii qaza qənaət və 96 min ton zərərli emissiyanın azaldılması deməkdir.

İstehsal ediləcək enerjinin 75 milyon kilovat-saatı “AzərEnerji” ASC-yə, 131 milyon kilovat-saatı isə “virtual ötürülmə” prinsipi ilə iri istehlakçılara satılacaq. “Şəms” və “Üfüq” Günəş Elektrik Stansiyalarının 2027-ci ildə istismara verilməsi planlaşdırılır.