Hoxikyan: ”Putinin başqa yolu yoxdur, Paşinyanın qələbəsini qəbul edəcək”

“Rusiya uduzub, B planı yoxdur. Moskva fasilə götürüb, buradakı proksi qüvvələri isə nə etməli olduqlarına dair göstəriş alana qədər vaxt udmağa çalışır”.

Bunu erməni siyasi şərhçi Elen Hoxikyan iyunun 7-də Ermənistanda keçirilən parlament seçkilərinin nəticələrindən danışarkən deyib.

“Rusiya nüfuzunu necə qorumaq haqqında düşünür. Şok vəziyyətindədirlər, mövcud durumdan çıxış yolu axtarırlar. Proksi qüvvələrə gəlincə, Moskva necə göstəriş versə, onlar da elə davranacaqlar. Mandatları götürmək və ya imtina etmək qərarı onlardan asılı deyil”, – ekspert bildirib.

Hoxikyanın fikrincə, Rusiya kəskin addımlar atacağı təqdirdə Ermənistanı itirə biləcəyini də başa düşür. O hesab edir ki, Rusiya Prezidenti Vladimir Putinin başqa yolu yoxdur, sonda Ermənistan Baş naziri Nikol Paşinyanı qələbə münasibətilə təbrik etməli olacaq.

Şərhçi əlavə edib ki, radikal müxalifətin Azərbaycanla sülh prosesi barədə manipulyativ iddialarına baxmayaraq, Ermənistan vətəndaşları növbəti dəfə hakim “Vətəndaş Müqaviləsi” Partiyasını seçiblər.

Ekspertin iddiasına görə, ermənilər müharibə vəziyyətində yaşamaq istəmirlər, artıq bundan yorulublar.