İlham Əliyev Atom Enerjisi üzrə Beynəlxalq Agentliyin Baş direktorunu qəbul edib

Prezident İlham Əliyev martın 2-də Atom Enerjisi üzrə Beynəlxalq Agentliyin Baş direktoru Rafael Mariano Qrossini qəbul edib.

AEBA-nın Baş direktoru Azərbaycanın Qoşulmama Hərəkatına sədrliyinin uğurlu olmasına görə dövlət başçısını təbrik edib. Bildirib ki, Azərbaycanın bu Hərəkata sədrliyi praktiki xarakter daşıyaraq beynəlxalq sülh və təhlükəsizliyə böyük töhfə verib, Hərəkatın beynəlxalq aləmdə rolunu daha da gücləndirib. Rafael Mariano Qrossi ölkəmizlə rəhbərlik etdiyi agentlik arasında səmərəli əməkdaşlığın inkişaf etdiyini diqqətə çatdırıb.

Prezident Baş direktora tədbirdə iştirakına görə minnətdarlığını ifadə edib, AEBA ilə əməkdaşlığa böyük önəm verdiyini deyib. Dövlət başçısı nüvə texnologiyasından dinc məqsədlər üçün istifadənin vacibliyini bildirib. Bu xüsusda kənd təsərrüfatı, tibb, neft-kimya sahələrində Azərbaycanla agentlik arasında əlaqələrin praktiki əhəmiyyəti qeyd edilib.