İlham Əliyev Azərbaycan xalqının Novruz bayramını Xankəndidən təbrik etdi

Prezident İlham Əliyev martın 18-də Xankəndi şəhərində Novruz tonqalını alovlandırıb.

Dövlət başçısı Azərbaycan xalqını Novruz bayramı münasibətilə təbrik edib. O, artıq dördüncü dəfədir ki, bayram tonqalını azad edilmiş Qarabağ torpağında yandırdığını bildirib.

“2021-ci ildə Şuşada, 2022-ci ildə Suqovuşanda, keçən il Talış kəndində, bu dəfə isə Xankəndi şəhərində bayram tonqalı qalanır. Bu, böyük xoşbəxtlikdir. Xankəndi qədim Azərbaycan torpağıdır, Pənahəli xan tərəfindən salınıb.

Ancaq əfsuslar olsun ki, keçən əsrin 20-ci illərinin əvvəllərində tamamilə əsassız, heç bir hüquqi, siyasi və demoqrafik əsası olmadan burada muxtar vilayət yaradılıb və ondan sonra xalqımızın problemləri də başlayıb”, – Prezident İlham Əliyev belə deyib.

Prezident bayram təbrikində Xankəndinin mərkəzi meydanına “Zəfər meydanı” adı verildiyini də açıqlayıb:

“Uzun illər ərzində bu meydan və bu bina separatçıların yuvası idi. Məhz bu meydanda xalqımıza qarşı çirkin planlar hazırlanırdı. Məhz bu binada Xocalı soyqırımının törədilməsi üçün əmrlər verilmişdir. Bu gün isə biz bu meydanda dayanmışıq. Əziz xalqıma bildirmək istəyirəm ki, bu meydana mən “Zəfər meydanı” adı vermişəm, bundan sonra bura Zəfər meydanıdır”.

2023-cü il antiterror tədbirlərinə gətirən səbəblərdən danışan Prezident İlham Əliyev Ermənistanın İkinci Qarabağ müharibəsinin nəticələrindən dərs çıxarmadığını deyib.

“Əgər dərs olsaydı, antiterror əməliyyatının keçirilməsinə ehtiyac olmazdı. Ermənistan İkinci Qarabağ müharibəsindən sonra keçən üç il ərzində düzgün nəticə çıxarmayıb, öz qanunsuz silahlı birləşmələrini bizim torpağımızda əbədi saxlamaq, burada vaxtilə qanunsuz yaradılmış qondarma “Dağlıq Qarabağ respublikası”nı yaşatmaq istəyirdi. Bütün bunlar beynəlxalq hüquqa tamamilə ziddir və ən əsası Azərbaycan xalqının iradəsinə ziddir”, – Prezident İlham Əliyev bildirib.