İlham Əliyev Bəylik kəndində yeni inşa edilmiş fərdi evlərdə yaradılan şəraitlə tanış oldu

Prezident İlham Əliyev mayın 27-də Laçın rayonunun Bəylik kəndinin açılışında iştirak edib.

Laçın rayonunda Azərbaycan Prezidentinin xüsusi nümayəndəsi Məsim Məmmədov dövlət başçısına kənddə yaradılan şərait barədə məlumat verib.

Bildirilib ki, Bəylik kəndində klub-icma mərkəzində rəqs və digər dərnəklər fəaliyyət göstərəcək. Kənddə evlərin, sosial obyektlərin, küçələrin işıqlandırılmasında yaşıl enerjidən istifadə edilir. Bu məqsədlə digər obyektlər kimi klub-icma mərkəzinin binasının damında da Günəş panelləri quraşdırılıb.

Sonra İlham Əliyev Bəylik kəndində yeni inşa edilən fərdi evlərdə yaradılan şəraitlə tanış olub. Vurğulanıb ki, tamamilə yenidən tikilən kəndə ümumilikdə 90 ailə ‒ 360 nəfərin köçürülməsi nəzərdə tutulur.

Bu məqsədlə ərazisi 29,6 hektar olan kənddə 91 fərdi ev inşa olunub. Evlərdən 13-ü iki, 50-si üç, 15-i dörd, 13-ü isə beşotaqlıdır. O da diqqətə çatdırılıb ki, Bəylik kəndində əhalinin məşğulluğunun təmin edilməsi üçün hər cür şərait yaradılıb, iqtisadi, sosial və məişət təyinatlı müxtəlif müəssisələr tikilib, kənddaxili yollar, elektrik, rabitə, su xətləri çəkilib, qaz təchizatı təmin olunub.

Sonra İlham Əliyev Bəylik kəndinin sakinlərinə yeni evlərinin açarlarını təqdim edib.