İlham Əliyev Blinkenlə zəng zamanı nələri müzakirə etdi?

İnsan hüquqları məsələsini bəhanə edərək Azərbaycanın daxili işlərinə müdaxilə cəhdləri tamamilə qəbuledilməzdir.

Bunu “Azərtac”ın sualına cavabda Prezidentin Mətbuat Xidmətindən bildiriblər.

Qeyd olunub ki, ABŞ Dövlət katibi Entoni Blinkenlə Prezident İlham Əliyev arasında telefon danışığı zamanı bir çox məsələlərə, o cümlədən insan hüquqları mövzusuna toxunulub.

Prezident İlham Əliyev tərəfindən bildirilib ki, bir sıra Qərb ölkələrinin insan hüquqları ilə bağlı ikili standartlara əsaslanan qərəzli açıqlamalarını qəbul etmirik. Bu xüsusda Prezident Dövlət katibi Entoni Blinkenə Ermənistanda müxalifət nümayəndələrinin həbsi, hətta həbs müddətində ölüm hallarının olması, insan hüquqlarının pozulması hallarını xatırladıb.

Bildirib ki, bu kontekstdə Qərb ölkələrinin səssizliyi başadüşülən deyil, bu kimi faktların məhz ikili standartların bariz nümunəsi olduğu qeyd edilib.

Prezident İlham Əliyev telefon danışığı zamanı həmçinin Culian Assancın məhz jurnalist fəaliyyətinə görə uzun müddət fiziki və mənəvi işgəncələrə məruz qalması məsələsini bildirib. Culian Assancın ABŞ-yə ekstradisiya edilmək və edam olunmaq məsələsinin müzakirə edildiyi vurğulanıb. Dövlət başçısı onu da əlavə edib ki, insan hüquqları məsələsinə təkcə lokal deyil, bütövlükdə qlobal kontekstdə baxılması zəruridir.