İlham Əliyev Donald Tramp ilə söhbətləşib - Baku TV

Vaşinqtonda keçirilən Sülh Şurasının tarixi ilk iclası çərçivəsində Azərbaycan Prezidenti İlham Əliyev və ABŞ Prezidenti Donald Tramp arasında səmimi söhbət baş tutub. İki lider arasındakı bu təmas Azərbaycan-ABŞ strateji tərəfdaşlığının yeni və daha dinamik mərhələyə qədəm qoyduğunu bir daha nümayiş etdirir. Söhbət zamanı Donald Tramp ötən ilin avqust ayında Azərbaycan və Ermənistan arasında sülh gündəliyinin irəli aparılmasında əldə olunmuş uğurları yüksək qiymətləndirib və İlham Əliyevi "güclü lider" kimi xarakterizə edib. Görüşdə həmçinin Zəngəzur dəhlizi və beynəlxalq bağlantılar baxımından mühüm rol oynayan TRIPP layihəsi ətrafında fikir mübadiləsi aparılıb. Azərbaycanın Sülh Şurasına təsisçi üzv kimi dəvət olunması ölkəmizin qlobal təhlükəsizlik və sülhün təşviqindəki mühüm rolunun Vaşinqton tərəfindən rəsmən tanınması kimi qiymətləndirilir. Bu səmimi dialoq regionda davamlı sabitliyin qorunması və iqtisadi əməkdaşlığın genişləndirilməsi istiqamətində növbəti strateji addımdır.