İlham Əliyev Donald Trampa təbrik məktubu ünvanladı

“ABŞ-nin 47-ci prezidenti kimi fəaliyyətə başlamağınız münasibətilə sizə ən səmimi təbriklərimi çatdırmaqdan məmnunluq duyur, dost Amerika xalqının rifahı naminə qarşıdakı məsul ali dövləti fəaliyyətinizdə uğurlar arzulayıram”.

Prezident İlham Əliyevin ABŞ Prezidenti Donald Trampa təbrik məktubunda belə deyilir.

“Əminəm ki, sizin gələcək fəaliyyətiniz dünyada sülhün təşviqində, beynəlxalq təhlükəsizliyin gücləndirilməsində önəmli rol oynayacaq. Azərbaycanla ABŞ özlərinin milli təhlükəsizlik maraqları əsasında qlobal çağırışlar və təhdidlərə, beynəlxalq terrorizmə və onun müxtəlif təzahürlərinə qarşı mübarizədə daim sıx əməkdaşlıq ediblər.

ABŞ-nin müttəfiqlərinin enerji təhlükəsizliyinin təmin olunmasına xidmət edən, enerji sahəsində xoş ənənələrə əsaslan və möhkəm təməllər üzərində qurulan əməkdaşlığımızı yüksək qiymətləndirir, ölkəmizin enerji siyasətinə sizin verdiyiniz daimi dəstəyinizi xüsusi vurğulamaq istərdim. Biz həm ənənəvi, həm də yeni əməkdaşlıq sahələri üzrə ABŞ ilə fəal və səmərəli birgə işimizi, qarşılıqlı inam və etimada əsaslanan tərəfdaşlığımızı bundan sonra da qətiyyətlə davam etdirmək və sizinlə bu istiqamətlərdə sıx işləmək niyyətindəyik.

İnanıram ki, sizin yeni prezidentliyiniz dövründə Azərbaycanla ABŞ arasında dostluq və əməkdaşlıq münasibətləri daha da möhkəmlənəcək və yeni məzmun kəsb edəcək”, – deyə məktubda vurğulanıb.