İlham Əliyev Kəlbəcərlə bağlı fərman imzaladı

“Kəlbəcər rayonunda Bərpa, Tikinti və İdarəetmə Xidməti” publik hüquqi şəxs yaradılıb.

Bununla bağlı Prezident İlham Əliyev Fərman imzalayıb.

Eyni zamanda “Kəlbəcər rayonunda Bərpa, Tikinti və İdarəetmə Xidmətinin Nizamnaməsi” və “Kəlbəcər rayonunda Bərpa, Tikinti və İdarəetmə Xidməti” publik hüquqi şəxsin Müşahidə Şurasının tərkibi təsdiq edilib.

Sənədə əsasən, Müşahidə Şurasının sədri Kəlbəcər rayonunda Prezidentin xüsusi nümayəndəsi Bəşir Hacıyev təyin edilib.

“Kəlbəcər rayonunda Bərpa, Tikinti və İdarəetmə Xidməti” publik hüquqi şəxsin nizamnamə fondu 500 min manatdır və dövlət büdcəsinin vəsaiti hesabına formalaşır. Xidmətin saxlanılma xərcləri və fəaliyyəti dövlət büdcəsi və qanunla qadağan olunmayan digər mənbələr hesabına maliyyələşir.

Bundan əlavə, Prezident İlham Əliyev “Laçın rayonunda Bərpa, Tikinti və İdarəetmə Xidməti” publik hüquqi şəxsin yaradılması və fəaliyyətinin təmin edilməsi haqqında” imzaladığı fərmanda dəyişiklik edib.

Yeniliyə əsasən, “Laçın rayonunda Bərpa, Tikinti və İdarəetmə Xidməti” Laçına əhalinin qayıdışı ilə əlaqədar çoxmənzilli binaların və fərdi yaşayış evlərinin tikintisinin təşkili, bu qaydada tikilmiş çoxmənzilli binaların idarə edilməsi, habelə müvafiq ərazidə abadlaşdırma, yaşıllaşdırma və mənzil-kommunal təsərrüfatı sahələrində fəaliyyət göstərən publik hüquqi şəxs olacaq.

Qeyd edək ki, bundan əvvəl xidmətin fəaliyyət sahəsi Kəlbəcər rayonunu da əhatə edirdi.