İlham Əliyev müstəmləkə ərazilərindəki ədalətsizlikdən danışdı

“Əgər bu Fransadırsa, onda sən demə, Fransa yoxsul ölkə imiş”.

Bu sözləri Prezident İlham Əliyev yanvarın 7-də yerli televiziya kanallarına müsahibəsində deyib.

“Sözün düzü, bəlkə, on il bundan əvvəl heç mənim də bu bölgələrlə bağlı o qədər də çox xəbərim yox idi. Amma bu son qasırğa nəticəsində üzə çıxan məlumat məni bir daha dərindən sarsıtdı.

Sən demə, Fransa sayılan bir ərazidə əhalinin 70-75 faizi yoxsulluq şəraitində yaşayır. Axı nə üçün bu, onda Fransada olmalıdır? Fransanın Prezidenti oraya gəlib deyir ki, Fransa olmasa, siz 10 min dəfə daha pis yaşayarsınız. Hara daha pis yaşamaq olar? Yetmiş beş faiz yoxsulluq şəraitində, mənzil fondunun 30-40 faizi köhnəlmiş, qəzalı vəziyyətdə.

Əgər bu Fransadırsa, onda sən demə, Fransa yoxsul ölkə imiş. Yəni sadəcə olaraq oranı strateji bir məntəqə kimi saxlamaq, oranın təbii sərvətlərini talamaq və xalqları əzmək, assimilyasiyaya məruz qoymaq, onları öz mənliyindən, dilindən, mədəniyyətindən məhrum etmək vəhşilikdir. Bu heç bir ölkəyə şərəf gətirmir”, – deyə dövlət başçısı vurğulayıb.