İlham Əliyev Rəcəb Tayyib Ərdoğana məktub ünvanladı

“Türkiyədə 15 İyul hadisələrinin yeddinci ildönümündə dövlət çevrilişi cəhdinin qarşısının alınması yolunda canlarını fəda etmiş şəhidlərimizin əziz xatirəsini dərin hörmət və ehtiramla yad edirik”.

Bu fikirlər Prezident İlham Əliyevin Türkiyə Prezidenti Rəcəb Tayyib Ərdoğana ünvanladığı məktubda yer alıb.

Dövlət başçısı bildirib ki, əsl qəhrəmanlıq dastanının yazıldığı o gün qardaş Türkiyə xalqının Rəcəb Tayyib Ərdoğana olan hədsiz inam və etimadın aşkar təzahürü kimi onun ətrafında sıx birləşməsi xain niyyətlərin qarşısına aşılmaz sipər çəkərək ölkəni böyük faciələrdən xilas etdi.

Qeyd edilib ki, Azərbaycan xalqı və dövləti bu mücadilədə ilk anlardan qardaş Türkiyə dövlətinin və xalqının yanında olub, ölkənin Konstitusiya quruluşuna, legitim hakimiyyətinə qəsd edən Vətən xainlərini birmənalı şəkildə pisləyib.

“Biz bu hadisələrdən daha da güclənərək çıxmış Türkiyə xalqının zəfərini öz zəfərimiz, sevincini öz sevincimiz, hüznünü öz hüznümüz olaraq paylaşdıq və bir millət, iki dövlət olduğumuzu bir daha əyani şəkildə sübut etdik”,– deyə vurğulayan Prezident İlham Əliyev onu da əlavə edib ki, ən böyük sərvətimiz olan sarsılmaz Azərbaycan-Türkiyə qardaşlığını, birliyini və həmrəyliyini qoruyub saxlamaq və gələcək nəsillərə ərmağan etmək, strateji müttəfiqliyimizi hərtərəfli inkişaf etdirmək və möhkəmləndirmək naminə birgə səylərimizi bundan sonra da ardıcıl şəkildə davam etdirəcəyik.