İlham Əliyev və Mehriban Əliyeva "Hilton Garden Inn" hotelində tikinti işləri ilə tanış olub

Prezident İlham Əliyev fevralın 18-də Ağdam şəhərinə səfər edib.

Səfər çərçivəsində Prezident İlham Əliyev və birinci xanım Mehriban Əliyeva Ağdamda “Hilton Garden Inn” hotelində aparılan tikinti işləri ilə tanış olublar.

Ağdam, Füzuli və Xocavənd rayonlarında Azərbaycan Prezidentinin xüsusi nümayəndəsi Emin Hüseynov dövlət başçısına və birinci xanıma hoteldə görülən işlər barədə məlumat verib.

Bildirilib ki, “Hilton Garden Inn” hoteli Ağdam şəhər mərkəzinə yaxın ərazidə inşa olunub.

Ümumi sahəsi 2,16 hektar olan hotel 2, 6 və 7 mərtəbəli 3 bloklu binadan ibarətdir. Ən müasir standartlara cavab verən hotel binasında 127 otaq var, qonaqların zövqünü oxşayan interyer işləri görülüb.

Bildirilib ki, hoteldə işlərin icrası 60 faiz yerinə yetirilib. “Hilton Garden Inn” hotelində 100-dən çox işçinin fəaliyyət göstərməsi nəzərdə tutulub.

Prezident İlham Əliyev və birinci xanım Mehriban Əliyeva fevralın 18-də Ağdam Muğam Mərkəzində görülən tikinti işləri və “Ağdam Residence” yaşayış kompleksində yaradılan şəraitlə də tanış olublar.

Prezident İlham Əliyev həmçinin fevralın 18-də “Azərişıq” Açıq Səhmdar Cəmiyyətinin Ağdam Regional Rəqəmsal İdarəetmə Mərkəzi və Təlim-Tədris Kompleksinin açılışında iştirak edib. “Azərişıq” ASC-nin sədri Vüqar Əhmədov dövlət başçısına Mərkəzdə görülən işlər barədə məlumat verib.