İlham Əliyev və Monteneqro Prezidenti arasında önəmli müzakirə

Prezident İlham Əliyev noyabrın 14-də Monteneqronun Prezidenti Yakov Milatoviçlə görüşüb.

Yakov Milatoviç COP29-un yüksək səviyyədə keçirilməsi münasibətilə dövlət başçısını təbrik edərək vurğulayıb ki, COP29-u uğurlu tədbir adlandırmaq olar.

O, burada 80-dən çox dövlət və hökumət başçısının iştirak etdiyini deyib və qeyd edib ki, COP eyni zamanda Azərbaycanın nailiyyətlərini dünyada göstərir.

Yakov Milatoviç vurğulayıb ki, Monteneqro Azərbaycanın ərazi bütövlüyünü və suverenliyini daim dəstəkləyib.

Qonaq Azərbaycanın işğaldan azad edilmiş ərazilərində genişmiqyaslı bərpa və quruculuq işlərini qeyd edərək, ölkəmizin çox böyük və unikal inkişaf yolu keçdiyini məmnunluqla vurğulayıb.

Azərbaycanın COP29-u qısa müddət ərzində təşkil etdiyini deyən İlham Əliyev bildirib ki, ölkəmiz COP-a sədrliyə başladığı vaxtdan bizə qarşı “feyk news” və qarayaxma kampaniyasına start verilib. Bu kampaniyada elə təqdim edilir ki, guya Azərbaycan ətraf mühiti çirkləndirir. Amma reallıq belə deyil. Dövlət başçısı deyib ki, bəzi dairələr Azərbaycanın uğurlarını, inkişafını və müstəqil siyasətini həzm edə bilmirlər.

İlham Əliyev Azərbaycanın 2019-2023-cü illərdə Qoşulmama Hərəkatına uğurla sədrlik etdiyini xatırladıb. İşğaldan azad edilmiş ərazilərimizdə genişmiqyaslı bərpa-quruculuq işlərinin aparıldığını deyən dövlət başçısı qeyd edib ki, ermənilər həmin ərazilərimizi minalayıblar, müharibə bitəndən indiyədək 300-ə qədər Azərbaycan vətəndaşı minaların partlaması səbəbindən ya həlak olub, ya da ağır yaralanıb. İşğal dövründə Ermənistan şəhərlərimizi və kəndlərimizi dağıdıb.

Görüşdə ikitərəfli münasibətlərin inkişafından məmnunluq ifadə olunub, turizm, sərmayələr sahəsində əməkdaşlıq imkanları ilə bağlı fikir mübadiləsi aparılıb.

Monteneqro Prezidenti dövlət başçısını ölkəsinə, Azərbaycan Prezidenti isə Monteneqronun dövlət başçısını ölkəmizə rəsmi səfərə dəvət edib. Dəvətlərlə bağlı qarşılıqlı minnətdarlıq ifadə olunub.